Það vakti nokkra kátínu á borgarstjórnarfundi í dag þegar ræða mín um frístundir barna fór að snúast um hringtorg. Eðlilega – ég geri mér grein fyrir að langt er seilst – en þó er nauðsynlegt að skoða stóru myndina og ræða það hvar og hvenær sjónarmið og hagsmunir barna eru tekin inn í pólítíska umræðu og ákvarðanatöku.

Frístundir barna eru með mjög ólíku sniði í hverfum borgarinnar. Sum börn geta gengið allra sinna ferða á meðan önnur börn þurfa á mun flóknari samgönguháttum að halda - oft þannig að almenningssamgöngur duga ekki til. Borgaryfirvöld hafa á undanförnum misserum brugðist við með sérstökum aukafjárveitingum í þágu almenningssamgangna fyrir börn, með frístundastrætóum og félagarútum. Að sama skapi hafa endurbætur og lagfæringar á gönguleiðum verið framkvæmdar og hávær krafa er uppi um frekara átak í þeim efnum.

Á fundinum talaði ég alls ekki gegn því að farið yrði í þessar lagfæringar – hvorki á almenningssamgöngukerfinu né á gönguleiðum. Ég benti þó á að þessi vinnubrögð yrðu að heyra sögunni til, það má ekki vera þannig að börn og þeirra hagsmunir gleymist eða verði útundan við skipulagningu og útfærslu á borginni og þjónustu hennar. Það er ekki boðlegt að fyrst sé ákvörðunin tekin og svo sé farið  eftirá í lagfæringar og endurbætur til að koma til móts við börnin.

Þá komum við að hringtorgunum. Ég er fullorðin kona og hef haft bílpróf í næstum tuttugu ár. Ennþá þarf ég þó að einbeita mér í akstri um hringtorg – og ekki síður þegar ég er fótgangandi nærri slíkum mannvirkjum. Hvernig í ósköpunum á að útskýra fyrir grunnskólabörnum hvað beri að varast þegar gengið er yfir að- og útkeyrslur á hringtorgum? -Hvenær eru bílarnir að stoppa fyrir öðrum bílum og hvenær eru þeir að stoppa fyrir þeim sem eru fótgangandi?

Hringtorg eru gerð til þess að greiða fyrir bílaumferð á gatnamótum og virka ágætlega sem slík. Þau eru afleit fyrir gangandi og hjólandi og um þau gilda reglur sem eru allt of flóknar til að hagsmunir barna hafi verið hafðir að leiðarljósi við hönnun þeirra.

Borgaryfirvöldum ber að hafa hagsmuni allra borgarbúa að leiðarljósi við alla ákvarðanatöku, sama hvort það er á vettvangi leikskóla, frístunda, skipulags eða samgöngumannvirkja – því jafnvel þótt tengslin séu oft vandséð, þá eru þau til staðar í öllum tilfellum.

Í ljósi fjölmiðlaumfjöllunar undanfarinn sólarhring um framkvæmd forvals Vinstri grænna í Reykjavík vil ég koma mínum sjónarmiðum á framfæri. Það er í raun ekki margt sem ég hef við úrskurð kjörstjórnar að bæta eða yfirlýsingu sem síðar var send út. Þar kemur fram að forvalið fór fram í samræmi við settar reglur og með sama sniði og árin 2007 og 2009 og öll tvímæli tekin af um kosningasvindl.

Lesa afganginn af þessari færslu »

Þá er forvali Vinstri grænna í Reykjavík lokið. Þar kom berlega í ljós að Vinstri græn hafa mikinn hug á að vinna sveitarstjórnarkosningarnar í vor, enda var þátttakan afar góð. Ég er glöð og þakklát með það traust sem félagar mínir sýndu mér og staðráðin í að standa undir því á komandi kjörtímabili. Að sama skapi er ég afskaplega ánægð með þann hóp fólks sem valinn var til verka og sannfærð um að hann mun vinna frábært starf á næstu fjórum árum.

Lesa afganginn af þessari færslu »

Á morgun munum við Vinstri græn í Reykjavík velja fólk í sex efstu sæti framboðslistans til borgarstjórnarkosninganna í vor. Eftir u.þ.b. sólarhring verður ljóst hver kemur til með að leiða listann. Þar sem ég ligg nú lasin í rúminu, spennt yfir því sem verða vill, hef ég verið að hugsa um og rifja upp helstu atburði undanfarinna fjögurra ára.

Lesa afganginn af þessari færslu »

Því hefur lengi verið haldið fram að á sveitarstjórnarstiginu séu kjörnir fulltrúar yfirleitt sammála, enda sé verið að fjalla um svo sjálfsagða grunnþjónustu að fátt skilji áherslur stjórnmálaflokkanna að. Það má vera að kjörnir fulltrúar í sveitarstjórnum séu oftar sammála en kjörnir fulltrúar á Alþingi, ég hef ekki kannað það sérstaklega, en það skiptir engu að síður gríðarlega miklu máli hvaða flokkar eru í meirihluta. –Og líklega skiptir það enn meira máli nú þegar þröngt er í búi.

Lesa afganginn af þessari færslu »

Fyrir nokkrum dögum bloggaði ég um alla þá vinnu sem þarf að eiga sér stað til að fyrsta vinstrisinnaða ríkisstjórn sögunnar geti komið áherslum sínum á framfæri. Sú færsla fjallaði um eina afmarkaða stofnun í einu afmörkuðu ráðuneyti – RÚV ohf. Ákvörðun umhverfisráðherra um að staðfesta ekki skipulag fyrir virkjanir í neðri Þjórsá er annað dæmi.

Lesa afganginn af þessari færslu »

Ég hef svo sem ekki farið varhluta af þeim áhrifum sem hægt er að hafa með þátttöku í sveitarstjórnum, en gerði mér ekki grein fyrir því hversu lengi þau vara fyrr en fyrir stuttu. Áhrifa Árna Þórs Sigurðssonar gætir enn í Reykjavík, enda var hjólreiðaáætlun sem hann mælti fyrir á sínum síðasta borgarstjórnarfundi haustið 2007 samþykkt í dag.

Lesa afganginn af þessari færslu »

Sumir vilja meina að á Íslandi hafi verið gerð bylting síðasta vetur. Að þá hafi þjóðin gert upp við frjálshyggjuna sem á 17 árum kom þjóðinni á vonarvöl. Þó þjóðin sé e.t.v. óþolinmóð og finnist ekki nóg að gert, þá hafi hún kosið sér nýja fulltrúa og þar með sé málið dautt.

Lesa afganginn af þessari færslu »